Info Shqip
Bijello Pole, 10 prill 2025 – Në ambientet e hotelit “Franca” u zhvillua sot Tryeza e Rrumbullakët me temën “Historia e përbashkët dhe participimi politik i popujve pakicë”, e organizuar nga Drejtoria për Mbrojtjen dhe Avancimin e të Drejtave të Popujve Pakicë dhe Pakicave të tjera Nacionale.
Ky aktivitet u zhvillua në kuadër të Planit të Veprimit për vitin 2025, që buron nga Strategjia për Popujt Pakicë 2024–2028.
Ligjëruesi kryesor i këtij diskutimi ishte profesori i njohur Adnan Prekiç, i cili ndau me të pranishmit një analizë të thelluar mbi kontributin historik të popujve pakicë në ndërtimin e identitetit shoqëror dhe politik në rajon, si dhe rolin e tyre aktual në jetën politike.
Tryeza solli bashkë përfaqësues të institucioneve, studiues, aktivistë dhe përfaqësues të komuniteteve pakicë, të cilët diskutuan sfidat dhe mundësitë për përfshirje më të madhe të këtyre komuniteteve në vendimmarrje dhe institucione demokratike.
Ngjarja u vlerësua si një hap i rëndësishëm drejt forcimit të bashkëjetesës, mirëkuptimit dhe përfshirjes efektive të të gjitha komuniteteve në shoqërinë multietnike.